Seîd Veroj: Dat Tahîr ti çend serre yî?

Tahîrê Şahînî (Tahir Ortaç): Wexto ke Armenî dayê piro, ez hinî temam bîya, 5-6 serre bînê. 

- Ti binkî dewa Hopê yan şima sewbîna ca ra ameyê ewta?

- : Mi çimê xo akerdî ez ewta de bîya, feqet pîyê mi dewa Herêdan ra ameyo Hope.

- Herêdan de zî Armenî bînê?

:- Erê ewra de zî bînê, Pîran de zî bînê, Tilbexdad û Dilbe de bînê, Hêne de bînê, dewda ma de bînê û Heselme de bînê, Armenî zafî bî. 

- Dat Tahîr, Şerê Dêrsimî zî yeno to vîrî?

:- La ez tede bîya, ewra de esker bîya, senî nîno mi vîrî. Ez 60. Alay, 1.  Tabur û 2. bolige de esker bîya. Ma ewra ra raykerdî Dêrsim. Wexto ke ma ameyê Diyarbekir, ez şiya Şilbe, key Hacike ke birakeyna Zilvîyê Mistê Fîncanî bî, Şilbe de zewicnay bî. Wexto ke ez ameya înan cew çînaynyê. Mi va Hacê, va ha! Mi va ti şiya dewe, to keyê ma ra yew dî? Va: Willa ez nêşiya feqet zamayê şima Husên ame weyra, va pêro weşî. Êdî ma ewra ra da piro şiyê Dêrsim.

- Şerî çi wext û senî dest bide (pê) kerd?

-: Aşma peyên a wesar bî, Diyarbekir de newe cewî çîniyaynê, ma ay wext şiyê û peynîya payîzî de ameyê.

- Şarê Dêrsimî dewlete ra çi waştê, çi qewmiya, şima ewra de çi kerd?

:- Înan zî dewlete de şer kerdê, eskerey-meskerey nêkerdê.

- Zaf mêrdimî kişyayî, senî hawa kiştî?

:- De hesabê kiştişî beno, zaf kiştî; ne vatê cinî, ne vatê extiyar, ne vatê gede, ayê ke pêçeke de bî ayê zî kiştî. Cephe yo ke ma tede bî, ewra de hîrê rojî û hîrê şewî vengê sîlehe cênêbirya, wexto ke teyara şona senî veng vejena abo hawa vengê teqayîşê sîlehe ameynê. Ez nêşiya ay cayan labelê ma ra 2-3-km dûrî bî. Şarê ewrayan pêrin xo mixaran (şikeftan) de limitê. Yew roj başçawîş ewniyeno ke ver bi mexrebî çend tenî mixara ver de asenê. De yew mixara nêbî, ewta ra heta ayreyê Gulî belkî des hebî mixareyê bînê. De mixareyê ay cayan ti veynê xo rê qirtê kê qerfîyenê, ne ver û ne peya. Ayê pêro bi emirbê Humayî eno hawa virazîyayî. Pêro qeytirme kerde yê, ti yew qeytirme vêrenê yewna yeno, ti ey vêrenê ayo bîn yeno. Pêro eno hawa yî. 

Ma şiyê ewniyayî, hîrê tenî fektê mixaran de kişyay bî. Cayo ke ez vana Çemîkezek bî. Qumandarê tabûre emir da û va şorê tifigan panê, ayê ke mendî wa îne zî vejî teber. Ma şî yew mixara ver, winî gorebê yew qame û qamûnême tikê berz bî, çawîşî ma ra ver û ma zî eyra dime tikê şiyê. Di hebî qulikî ana sey paja asenê. Çawîşî va: hela şorê bewnî veynê ay cayan de yew esto. Ez şiya zerre ke berê mixara ver de gî xo kerdo û hema gî înan wişk nêbîyo. Ez hêdîka peyser agêraya. Çawîşî mi ra va to cay çî dî, mi va wila berî ver de gi kerdo û hema gî înan wişk nêbîyo. Ame û o zî şî ewniya û hema apey agêra. Emir da û eskeran fekê tifingî da mîyanê mixara, qîj û qîj pana û qet veng nêvejiya.

Çawîş agêra mi ra va: Tahir, mi va ha. Va: ez to dekena mixara, mi zî ey ra va xo rê tifingê xo pane û mi bikişe, qey ez şona zerreyê mixara. Qey ez şima mîyan de gawir a, ez nêşona, hema ti zî pane û wa vajê vera Çawîşî ame û çawîşî ey kişt. Mi va: ez yewna vatiş to ra vana, eger ti qebûl kenê ez şona, eger ti qebûl nêkenê ez nêşona. Mi va: elektirîke to de esta bide mi ez şora yan zî ez nêşona. Va: wila elektrîke çinî ya feqet qutiya kirbîtî esta, ez bida to, pane û  ay rey de şo. 

Ez şiya berdê mixara ver û mi veng da va: Bewnîyê, ez yena zerre, e zî şima ra ya, ez Xozat ra ya, de şima mi kişenê û şima mi verdanê şima zanê. Şima se tenî bibê zî ez nêvana, şima yew ten bibo zî ez nêvana. Mi kirbît tavist, eno qenyntirme ra vêyarta ay qeyntirmî û ewra ra vêyarta ayê bînî, gelekî şiya feqet ez peynî nêresaya û agêraya. Ez ameya teber, qumandanî va to çî nêdî? Mi va: willa mi çî nêdî. Çawîşî mi ra bawer nêkerd, di hebîna eskerî dayê mi heta û va rayna şorê bewnînê. Ma şî verê berdê mixara, ayê eskerî bînî vernî de û ma şî zerre, bi kirdkî mi va: de pirodê gilikdê marda înanê, eskerê ke yenê Tirk î. Veng şi çawîşî zî. Çawîş agêra eskeran ra va: “gitmeyin, itoğluit birbirleriyle konuşuyorlar, birbirlerinin dillerini biliyorlar” (meşorê, kutikzayêkutikan yewbin de qisey kenê, ziwanê yewbine zanê). Ma peyser agêrayî. Ez aya mixara de tersaya yan zî sewbî cayê nêtersaya. 

- Sîlehê destê Kurdan çi bî û ê Tirkan çi bî?

:- Ê înan tifingî bî, ê ma zî axir makînalî û modelî û topî bî.

- Ay wext zaf dewî veşanayê? 

-: Dewê ke vengî bî pêro veşnaynê.

- Ti çi wext ewra ra agêrayî?

-: Wexto ke ma şiyê Kemal hema weş bî, Kemal ke merd ma kewtî binê emirdê Îsmetî. Ma şeş aşmî ewra da mendî, tira pey ma agêrayî. Wexto ke ma agêrayî, Xidir Damî tira vanê, Xidir Damî beyntarê Çêmîşkezek û Xozatî de yo. Ma ameyê ewra vindertî, rona. Hewna emir ame va: 60. Alayî û 1. Tabure hewna şona cepheyo verên. Ma 37 Alayî şîbî Dêrsimî ser, ma tena nêbî. Şew bînê, ti ewniyaynê serê ayê koyan safî îşaret mermîsî yê, şonê û yenê. Ma hewna şiyê, hinî ma zanê û alya qumandanî û lengî zanê. 

Ma şiyê çemê Mûnzirî ver, de çem pêl bi pêl awa lêle yana, cayê vêrî tede çinî yo û êdî mexreb o. Mi va ez tikê awe bişima, mi sefer tasî vete û çem ra awe todaye, mi dî yew embazî va; la şima kurdî çiqa pîs î. Mi va: liya kutikzayêkutikî ma çi pîseye kerda? Va: bewnî ay awe herom a, mi va ehende awe senî heram bena? Va: bewnî cor, ha yew laşê mêrdimî tede yeno. Mi va: liya wa se hebî mêrdimî tede bêrê, ena awe heram bena. Ma ana qalî pê girotî, va ez şona gerreyê to kena. Ma aya şew ewra de mendî û serê sibay qerar ame û va şima şonê Palo. Ma hîro rojî lingî Dêrsim ra ameyê dewa Heşîm Begê Paloy, êdî weyra de rona…