- Dapîr emrê to çiqas o, ti çend serre ya?

- Çi zana emrê mi çend o?

- Wexto ke fermana Armenîyan vejiyaye, hikumatî fermana îne vete, ti ay wext çend serre bîya?

- Ez ay wext hema gede hesibyaynê?

- Ti nizdî 15 serre bînê?

-E, e…

-Bewnî fermana Armenîyan eno 76 serran ra ver vejîyaya, eger ay wext ti poncês (15) serra biba, anka 91 serra ya.

- Şima kûra ra ameyê weyta?

- Ma Tilbexdad ra ameyê, ez Tilbexdad de bîya yanî cayo ke tira vanê dereca.[2] Ez ke zewicyaya[3] hema serra mi nêqedyaye, seferbêrlix ronîya, hikûmatî carmêrdî arêkerdî berdî û kiştî. Mensûr Emî ame polê mi kaşkerd, ez arda. Tehlo ay wext zeftîyo bejik bi, ame va: “Kam Armenîyan keyê xo de bilimno û hikûmat bêro veyno, adir nanê pa û keyeyê înan veşnenê.” To rê vaja Mensûr Emî pey hesîya ame keye va: “Kutikzayê kutikî, hesir bi çimandê mi vera, wa qeratê to mi ra nêaso. Mi arda û ay zî sey ewlada min a, ez senî bida.” Hema xo ra girot û şî, hêdî hayo bêro berî ver.

- Dapîr, Tilbexdad de malê şima zaf bînê?

- Malê ma zaf bî; daxanij, bazbendij û hopijan mîyan de bar kerd.

- Şima ay wext debara xo senî vîyarnaynê?

- Kirwas (qumaş) viraştênê, qelaçîyey kerdênê, hêgayê ma bînê û cite kerdênê. Ay verê beran pêro hêgayê key pêrdê mi bî. 

- Dapîr nameyê pêrdê to çi bi?

- Nameyê pêrdê mi Mînas û ê datê mi zî Tumas bî. Pîyê mi rew merd.

- Nameyê maya to çi bi?

- Nameyê aye zî Mayrome bî.

- Şima çend way û biray bî?

- Ma ponc (5) birayî û yew waye, ez tena bîya.

- Sewbî mêrdimê şima?

- Yayika mi bînê, cenîya Xaçêr Efendî bî. Hagop Efendî û Xaçêr Efendî pîlê ma bî. Hey Dinyayê, ma çi dî û çi nêdî…[1]


 

[1] Eno mulaqat, dewa Hope de û serra 1991î de ameyo kerdiş. Wexto ke eno mulaqat Dapîra Belqîza reyde ame kerdiş, emrê ya nizdî 90-91 serrî bîy. 

[2] Dereca: Dereca verê çemî de nameyê yew cayî yo, ke eyro hîmê dêsê Berajê Qama Keynada Qiralî ewcay ser o virazyayo.

[3] Hemoyê Xal Zoroy vano: Maya mi vatê veyveyê Belqîza yeno mi vîrî, mi temaşeyê veyvedê ja kerd, Ehmedê Husênê Kêwayî, lûlbendê veyvedê înan bî û nameyê mêrdedê ja yo verên zî Pîlo bîyo.